સ્વર્ણિમ યુનિવર્સિટીનો ડ્રોન-રોબોટિક્સ ક્ષેત્રે ઉદ્યોગ સાથે સહયોગ, વિદ્યાર્થીઓને મળશે ઇન્ટર્નશિપ અને પ્રોજેક્ટની તકો
: સ્વર્ણિમ સ્ટાર્ટઅપ એન્ડ ઈનોવેશન યુનિવર્સિટી અંતર્ગત સ્વર્ણિમ ઇન્સ્ટિટ્યૂટ ઑફ ટેક્નોલોજી (SIT) અને ઝેનહેસ્ટર ઇનોવેશન પ્રા. લિ. (Xenhester Innovation Pvt. Ltd. ) વચ્ચે ડ્રોન અને રોબોટિક્સ ક્ષેત્રે ઉદ્યોગ-શૈક્ષણિક સહયોગને મજબૂત બનાવવા માટે મેમોરેન્ડમ ઑફ અન્ડરસ્ટેન્ડિંગ (MoU) કરવામાં આવ્યો છે.
આ ભાગીદારીનો હેતુ વિદ્યાર્થીઓને ઉભરતી ટેક્નોલોજીનો પ્રાયોગિક અનુભવ પૂરો પાડીને શૈક્ષણિક અભ્યાસ અને ઉદ્યોગની જરૂરિયાતો વચ્ચેનું અંતર ઘટાડવાનો છે. MoU અંતર્ગત વિદ્યાર્થી પ્રોજેક્ટ માર્ગદર્શન, લાઇવ પ્રોજેક્ટ્સ, ઇન્ટર્નશિપ, ઔદ્યોગિક મુલાકાત, વર્કશોપ, સંશોધન, પ્રોટોટાઇપિંગ, ટેસ્ટિંગ તથા ટેક્નોલોજી ડેવલપમેન્ટ જેવી વિવિધ પ્રવૃત્તિઓમાં સહયોગ કરવામાં આવશે.
ઝેનહેસ્ટર ઇનોવેશન (Xenhester Innovation) દ્વારા મેન્ટર્સ અને વિષય નિષ્ણાતો દ્વારા ઉદ્યોગલક્ષી તાલીમ પૂરી પાડવામાં આવશે. સાથે જ વિદ્યાર્થીઓને ઇન્ટર્નશિપ, પ્રોજેક્ટ માર્ગદર્શન અને પ્રાયોગિક શિક્ષણમાં સહાય કરવામાં આવશે. સ્વર્ણિમ ઇન્સ્ટિટ્યૂટ ઑફ ટેક્નોલોજી (SIT) દ્વારા જરૂરી ઇન્ફ્રાસ્ટ્રક્ચર, લેબોરેટરી, ટેકનિકલ સહયોગ અને વિદ્યાર્થીઓની ભાગીદારી સુનિશ્ચિત કરવામાં આવશે.
MoU હેઠળ સંયુક્ત સંશોધન પ્રસ્તાવો અને ઉદ્યોગ-શૈક્ષણિક નવીનતા પ્રવૃત્તિઓને પણ પ્રોત્સાહન આપવામાં આવશે, જેના માધ્યમથી વિદ્યાર્થીઓ અને ફેકલ્ટીને ડ્રોન તથા રોબોટિક્સના વાસ્તવિક ઉપયોગો સાથે જોડાવાની તક મળશે. આ સહયોગથી વિદ્યાર્થીઓની ટેકનિકલ કુશળતા, નવીનતા ક્ષમતા અને કારકિર્દી માટેની તૈયારી વધુ મજબૂત બનશે તથા ઉભરતી ટેક્નોલોજીના ક્ષેત્રોમાં ભવિષ્ય માટે તૈયાર પ્રતિભા વિકસાવવામાં મદદ મળશે.
