તા.૦૭/૦૧/૨૦૨૩ના રોજ મહિલા અને બાળવિકાસ વિભાગ ગુજરાત રાજ્ય અને જિલ્લા પંચાયત કચ્છ-ભુજ આઇસીડીએસ ઘટક રાપર-૧ અને ૨ ના સંયુક્ત ઉપક્રમે ઠાકોર સમાજવાડી રાપર ખાતે સશક્ત અને સુપોષિત કિશોરી અભિયાન હેઠળ કિશોરી મેળાનું આયોજન કરવામાં આવ્યું હતું. આ કાર્યક્રમ રાપર ધારાસભ્યશ્રી વિરેન્દ્રસિંહ જાડેજાના અધ્યક્ષસ્થાને યોજવામાં આવ્યો હતો.
કાર્યક્રમની શરૂઆત રાપર ધારાસભ્યશ્રી વિરેન્દ્રસિંહ જાડેજાના વરદ હસ્તે દિપ પ્રાગટ્ય દ્વારા કરવામાં આવી હતી તેમજ કાર્યક્રમમાં હાજર રહેલા મહેમાનોનું શાલ ઓઢાડી તેમજ પુષ્પગુચ્છ દ્વારા કિશોરીઓના દ્વારા સ્વાગત કરવામાં આવ્યું હતું. સીડીપીઓશ્રી જે.કે.પરમારે કાર્યક્રમમાં ઉપસ્થિત તમામ મહેમાનોનું તથા સંલગ્ન વિભાગનાં અધિકારીશ્રી/કર્મચારીશ્રીઓનું તેમજ કાર્યક્રમમાં હાજર આંગણવાડી વર્કર, કિશોરીઓનું શાબ્દિક સ્વાગત કરી મહિલા અને બાળવિકાસ વિભાગ ગુજરાત રાજય દ્વારા ચાલી રહેલ સશક્ત અને સુપોષિત કિશોરી અભિયાન બાબતે વિશેષ માર્ગદર્શન આપ્યું હતું. તેઓએ આ કિશોરી મેળો યોજવા પાછળનો ઉદ્દેશ તથા હાર્દ બાબતે સૌને માર્ગદર્શિત કર્યા હતા.
કાર્યક્રમમાં ઉપસ્થિત તાલુકા કાનૂની સેવા સત્તા મંડળના પ્રતિનિધી એડવોકેટ શ્રી મહેશભાઇ ગઢવી, શ્રી મહાવીરસિહ જાડેજાએ મહિલા અને કિશોરીઓને લગતા કાનૂની મુદ્દા અને હક્કો બાબતે સમજ આપી હતી. આરોગ્ય વિભાગના સુ.શ્રી.નિધીબેન પટેલ દ્વારા કિશોરીઓને આરોગ્ય અને સમતોલ આહાર બાબતે વિશેષ માર્ગદર્શન આપવામાં આવ્યું તેમજ આઇટીઆઇ રાપરના પ્રતિનિધિ શ્રી ઘનશ્યામ સોલંકી દ્વારા કિશોરીઓના કૌશલ્ય વર્ધન અને સ્વાવલંબી બનવા માટેના આઇટીઆઇ રાપર દ્વારા ચાલતા વિવિધ અભ્યાસક્રમો બાબતે સમજ આપવામાં આવી હતી.
તાલુકા પ્રાથમિક શિક્ષણાધિકારી શ્રી કમલેશભાઇ દેસાઇ દ્વારા પણ પ્રસંગને અનુરૂપ કિશોરીઓ શિક્ષિત બની, જાગૃત રહી અને સ્વાવલંબી અને સુપોષિત બને માટે માર્ગદર્શન આપવામાં આવ્યું હતું. પોલીસ સ્ટેશન રાપરના પીએસાઇ શ્રી જી.બી.માજીરાણાએ પણ મહિલાઓ અને કિશોરીઓને કાયદાકીય સલાહ અને સૂચનો આપી પ્રોત્સાહીત કરી હતી. કાર્યક્રમમાં ઉપસ્થિત તમામ કિશોરીના પ્રતિનિધિ તરીકે કુમારી પૂજાબા વાઘેલા દ્વારા કિશોરીઓને લગતી યોજનાઓ અને આરોગ્યલક્ષી માર્ગદર્શન આપવામાં આવ્યું.
આઇસીડીએસ કચેરી રાપર દ્વારા આઇસીડીએસ યોજના અને તેને લગતાં સાહિત્ય વિતરણનો સ્ટોલ રાખવામાં આવ્યો હતો તેમજ આંગણવાડી વર્કરો દ્વારા કેન્દ્ર મુજબ વાનગી હરીફાઇનો સ્ટોલ, આઇટીઆઇ રાપર, પોસ્ટ ઓફિસ રાપર, આરોગ્ય વિભાગ તેમજ એકિસસ બેંક રાપર દ્વારા તેમની કામગીરી સંલગ્ન સાહિત્ય સાથે સ્ટોલ રાખવામાં આવેલા હતા. આ સ્ટોલની ધારાસભ્ય શ્રી વિરેન્દ્રસિહ જાડેજાએ દ્વારા મુલાકાત લઈને યોગ્ય માર્ગદર્શન પુરૂ પાડ્યું હતુ. ઉપરાંત કિશોરીઓ માટે સેલ્ફી સ્ટેન્ડ રાખવામાં આવેલ તેનો બહોળી સંખ્યામાં કિશોરીઓએ લાભ લીધેલ હતો તેમજ મહાનુભાવો સમક્ષ કિશોરી દ્વારા “પ્રાઇડ વોક” પણ આયોજન કરવામાં આવ્યું હતું. સશક્ત અને સુપોષિત કિશોરી સિગ્નેચર અભિયાન હેઠળ કિશોરીઓએ પ્રતિજ્ઞાપત્રમાં સહીઓ કરી પ્રતિજ્ઞા લીધી હતી. આ સમગ્ર કાર્યક્રમનું સંચાલન ધર્મેંદ્રભાઇ હોથી દ્વારા કરવામાં આવ્યું હતું અને પુરીબા વાઘેલા દ્નારા આભાર વિધી કરાઈ હતી.
આ કિશોરી મેળામાં જિલ્લા પંચાયત કચ્છ-ભુજના ઉપપ્રમુખશ્રી વણવીરભાઇ રાજપૂત, તાલુકા પંચાયત પ્રમુખશ્રી હમિરસિંહજી સોઢા, તાલુકા પંચાયત ઉપપ્રમુખશ્રી કાનજીભાઇ ગોહિલ તેમજ તાલુકાના રાજકીય અને સામાજિક અગ્રણીઓ સર્વેશ્રી ભગાભાઈ આહિર, શ્રી જયદિપસિંહ જાડેજા, શ્રી નશાભાઇ દૈયા, શ્રી રમેશભાઇ દાદલ, શ્રી ઉમેશભાઇ સોનીએ પ્રેરક હાજરી આપી કિશોરીઓને પ્રોત્સાહિત કરી હતી તેવું શ્રી જે.કે.પરમાર, બાળ વિકાસ યોજના અધિકારીશ્રી રાપરની અખબારીયાદીમાં જણાવાયું છે.
