જામનગર વન વિભાગ દ્વારા આયોજિત ૭૭મા જિલ્લા કક્ષાના વન મહોત્સવ-૨૦૨૬ની ઉજવણીના ભાગરૂપે, ગુજરાત સરકારના પ્રાથમિક, માધ્યમિક અને પ્રૌઢ શિક્ષણ મંત્રી શ્રીમતી રિવાબા રવિન્દ્રસિંહ જાડેજાએ ૩૦ ઓગસ્ટ ૨૦૨૬ના રોજ જામનગર સ્થિત સૈનિક સ્કૂલ બાલાચડીની મુલાકાત લીધી હતી.
સૈનિક સ્કૂલ બાલાચડીના આચાર્ય ગ્રુપ કેપ્ટન ઉજ્જવલ ઘોરમાડે દ્વારા મુખ્ય અતિથિનું ઉષ્માભર્યું સ્વાગત કરવામાં આવ્યું હતું. મુલાકાત દરમિયાન, તેમને બાલાચડી ખાતે આવેલી ‘પોલિશ પ્લેક’ ના ઐતિહાસિક મહત્ત્વ વિશે માહિતી આપવામાં આવી હતી. આ સ્મારક તકતી બીજા વિશ્વયુદ્ધ દરમિયાન પોલિશ શરણાર્થીઓ સાથે બાલાચડીના ગાઢ સંબંધો અને તત્કાલીન જામસાહેબ દ્વારા તેમને પૂરી પાડવામાં આવેલી માનવીય સહાયની યાદ અપાવે છે. આ માહિતી કેડેટ ધ્વનિ અને કેડેટ દીક્ષા દ્વારા રજૂ કરવામાં આવી હતી.
કાર્યક્રમની શરૂઆત શાળાના ઓડિટોરિયમમાં રાષ્ટ્રગીત ‘વંદે માતરમ્’ના ગાન સાથે થઈ હતી, ત્યારબાદ મુખ્ય અતિથિના હસ્તે દીપ પ્રાગટ્ય કરવામાં આવ્યું હતું. કેડેટ રિયાએ ભરતનાટ્યમ શૈલીમાં સુંદર ભક્તિમય શાસ્ત્રીય નૃત્ય રજૂ કરીને ઉપસ્થિત પ્રેક્ષકોને મંત્રમુગ્ધ કરી દીધા હતા.
જામનગર વન વિભાગના ડેપ્યુટી કન્ઝર્વેટર ઓફ ફોરેસ્ટ્સ શ્રીમતી રાધિકા પરસાણાએ સ્વાગત પ્રવચન આપ્યું હતું. કેડેટ દીક્ષા અને કેડેટ અર્પિતાએ મુખ્ય અતિથિનો ટૂંકો પરિચય આપ્યો હતો.
મરીન નેશનલ પાર્ક, જામનગરના ચીફ કન્ઝર્વેટર ઓફ ફોરેસ્ટ્સ શ્રી મનિશ્વર રાજાએ મુખ્ય અતિથિને રોપો અર્પણ કરીને તેમનું સ્વાગત કર્યું હતું.
આ પ્રસંગે, કેડેટ શિવમ દાસે હિન્દી ભાષામાં ભારતની મહાનતા અને વિવિધતા પર પ્રકાશ પાડતું વક્તવ્ય આપ્યું હતું. સાંસ્કૃતિક કાર્યક્રમમાં બાલનિકેતન પ્રાથમિક શાળાના વિદ્યાર્થીઓ દ્વારા દેશભક્તિના નૃત્યો પણ રજૂ કરવામાં આવ્યા હતા; તેમની ઉત્સાહપૂર્ણ રજૂઆતોને પ્રેક્ષકોએ તાળીઓના ગડગડાટ સાથે વધાવી લીધી હતી.
સૈનિક સ્કૂલ બાલાચડીના આચાર્ય ગ્રુપ કેપ્ટન ઉજ્જવલ ઘોરમાડે એ સભાને સંબોધતા વૃક્ષો અને બાળકો વચ્ચે એક પ્રેરણાદાયી સામ્ય રજૂ કર્યું. તેમણે કહ્યું કે બંનેને વિકસવા માટે મજબૂત મૂળ, સંભાળ, સુરક્ષા અને સમયની જરૂર હોય છે. જેમ મજબૂત મૂળ ધરાવતું વૃક્ષ વાવાઝોડાનો સામનો કરી શકે છે, તેમ મજબૂત મૂલ્યો સાથે ઉછરેલું બાળક આત્મવિશ્વાસ સાથે જીવનના પડકારોનો સામનો કરી શકે છે.
તેમણે ભારપૂર્વક જણાવ્યું હતું કે શિક્ષણનો અર્થ માત્ર ગુણ અને પરીક્ષાઓ પૂરતો સીમિત નથી, પરંતુ તે દરેક બાળકમાં મજબૂત મૂલ્યો, ચારિત્ર્ય અને આત્મવિશ્વાસ કેળવવા વિશે છે જેથી તેઓ તેમની સંપૂર્ણ ક્ષમતાને સાકાર કરી શકે. તેમણે શાળાના પરિસરમાં હરિયાળું સુરક્ષા કવચ ઊભું કરવા માટે વન વિભાગ અને સૈનિક સ્કૂલ બાલાચડીના ભૂતપૂર્વ વિદ્યાર્થીઓના સહયોગથી હાથ ધરવામાં આવેલી મહત્વપૂર્ણ ‘વન કવચ’ પહેલ પર પણ પ્રકાશ પાડ્યો હતો. આ મહત્વાકાંક્ષી પહેલ હેઠળ લગભગ ૪૦,૦૦૦ રોપાઓ વાવવામાં આવ્યા છે.
જામનગરના મરીન નેશનલ પાર્કના ચીફ કન્ઝર્વેટર ઓફ ફોરેસ્ટ્સ મુખ્ય વન સંરક્ષક શ્રી મનીશ્વર રાજાએ તેમના સંબોધનમાં કેડેટ્સને સતત શીખવાની આદત કેળવવા માટે પ્રોત્સાહિત કર્યા. તેમણે વૃક્ષોના મહત્વ પર પણ પ્રકાશ પાડ્યો અને પર્યાવરણીય ટકાઉપણું માટે વન વિસ્તાર વધારવાની જરૂરિયાત પર ભાર મૂક્યો.
ઉજવણીના ભાગરૂપે, મુખ્ય અતિથિએ વિવિધ સ્પર્ધાઓમાં શ્રેષ્ઠ સ્થાન મેળવી શાળાનું ગૌરવ વધારનાર કેડેટ્સનું સન્માન કર્યું. ‘વર્ણી કપ’ વોલીબોલ , શાળાની બાળાઓની ફૂટબોલ સ્પર્ધામાં રનર્સ-અપ રહેનાર અને ‘સહોદય મેથેમેટિક્સ ટ્રેઝર હન્ટ ૨૦૨૬’માં ઉત્કૃષ્ટ દેખાવ કરનાર કેડેટ્સને તેમની સિદ્ધિઓના ઉપલક્ષમાં ઈનામો અને ટ્રોફી એનાયત કરવામાં આવ્યા.
મુખ્ય અતિથિ અને અન્ય મહાનુભાવોએ પર્યાવરણ પ્રત્યેની પ્રતિબદ્ધતા અને સામૂહિક જવાબદારીના પ્રતીકરૂપે વન વિભાગના અધિકારીઓને રોપા અર્પણ કરીને તેમનું પણ સન્માન કર્યું.
કાર્યક્રમમાં ઉપસ્થિત જનમેદનીને સંબોધતા, ગુજરાત સરકારના પ્રાથમિક, માધ્યમિક અને પ્રૌઢ શિક્ષણ મંત્રી શ્રીમતી રિવાબા રવિન્દ્રસિંહ જાડેજાએ ‘વંદે માતરમ્’નું મહત્વ અને ‘સુશાસન’ ની વિભાવના વિશે સમજણ આપી. તેમણે કેડેટ્સને નાગરિક ભાવના કેળવવા અને સમાજ તથા રાષ્ટ્ર પ્રત્યેની પોતાની જવાબદારીઓ દ્રઢ કર્તવ્યભાવના સાથે નિભાવવાની સલાહ આપી. તેમણે દરેક કેડેટને ‘વન કવચ’ અભિયાન હેઠળ તેમના દ્વારા વાવવામાં આવેલા રોપાના જતન અને રક્ષણની વ્યક્તિગત જવાબદારી સ્વીકારવા પણ અનુરોધ કર્યો.
મંત્રીએ ઈનામ વિજેતાઓ, શાળાના સત્તાવાળાઓ અને જામનગર વન વિભાગને કાર્યક્રમના સફળ આયોજન બદલ અભિનંદન પાઠવ્યા તેમજ પર્યાવરણ સંરક્ષણ અને વિદ્યાર્થીઓના સર્વાંગી વિકાસ માટેના તેમના સામૂહિક પ્રયાસોની પ્રશંસા કરી.
આ પ્રસંગે વિંગ કમાન્ડર કે. મારુતિ દેવી (નિવૃત્ત), શ્રી ગૌતમ લોડાલિયા SDM, ધ્રોલ, શ્રી વિનોદભાઈ ભંડેરી જિલ્લા ભાજપ પ્રમુખ, જામનગર અને શ્રી જયેન્દ્રસિંહ વાઘેલા સરપંચ, બાલાચડી સહિતના મહાનુભાવો ઉપસ્થિત રહ્યા હતા.
આ કાર્યક્રમના સંચાલક શ્રીમતી લાજવંતી યાદવ (ટીજીટી અંગ્રેજી )હતા. આભારવિધિ જામનગરના મરીન નેશનલ પાર્કના આસિસ્ટન્ટ કન્ઝર્વેટર ઓફ ફોરેસ્ટ્સ, શ્રી રોનેન સિંહ દ્વારા કરવામાં આવી હતી.
આ કાર્યક્રમ દરમિયાન વહીવટી અધિકારી કમાન્ડર હરિ રામ પૂનિયા, વાઇસ પ્રિન્સિપાલ સ્ક્વોડ્રન લીડર રાકેશ તિવારી, શાળાના કર્મચારીઓ અને કેડેટ્સ ઉપસ્થિત રહ્યા હતા.
મુખ્ય અતિથિ દ્વારા વૃક્ષારોપણ સાથે કાર્યક્રમની પૂર્ણાહુતિ થઈ, જેણે પર્યાવરણ સંરક્ષણ તથા હરિયાળા અને સ્વસ્થ ભવિષ્યના નિર્માણ પ્રત્યેની સામૂહિક પ્રતિબદ્ધતાને પુનઃદ્રઢ કરી.
