સમગ્ર રાજ્યમાં ‘સેવા સંકલ્પ અભિયાન’ ચાલી રહ્યું છે, જેના ભાગરૂપે શ્રમ, કૌશલ્ય વિકાસ અને રોજગાર કેબિનેટ મંત્રીશ્રી કુંવરજીભાઈ બાવળીયાએ જસદણ નગરપાલિકા ખાતે આયોજિત સર્વરોગ નિદાન કેમ્પ ખુલ્લો મુક્યો હતો.
મંત્રીશ્રી કુંવરજીભાઈએ કેમ્પના આયોજન અંગે માહિતી આપતા જણાવ્યું હતું કે, જસદણમાં ઘર આંગણે સ્પેશિયાલિસ્ટ તેમજ ૧૦થી વધુ સુપર સ્પેશિયાલિસ્ટની ટીમ દ્વારા નિદાન તેમજ સારવારની સુવિધા ઉભી કરવામાં આવી છે, જેનો તમામ ગ્રામજનો લાભ લઈ શકે છે.
પ્રધાનમંત્રીશ્રી નરેન્દ્રભાઈ મોદીની સેવાના ૨૫ વર્ષને યાદ કરતા ખાસ કરીને આરોગ્યલક્ષી સેવાઓનો ઉલ્લેખ કરતા મંત્રીશ્રીએ જણાવ્યું હતું કે, વડાપ્રધાનશ્રીએ સામાન્ય નાગરિકોને ઉત્કૃષ્ટ સારવાર મળી રહે તે માટે આયુષ્માન ભારત યોજના શરૂ કરેલી છે. વધુમાં હોસ્પિટલ અને આરોગ્ય કેન્દ્ર ખાતે પણ નિઃશુલ્ક સારવાર થકી એકપણ વ્યક્તિને આરોગ્યલક્ષી સુવિધામાં કચાશ ન રહે તેનો રાજ્ય સરકારના આરોગ્ય વિભાગ દ્વારા ખ્યાલ રાખવામાં આવી રહ્યો છે.
આજે બીજી ઓક્ટોબરના રોજ મહાત્મા ગાંધીજી તેમજ શ્રી લાલ બહાદુર શાસ્ત્રીજીના જન્મદિવસે તેમના રાષ્ટ્રપ્રેમ અને આદર્શો અનુસરી રાષ્ટ્રને મજબૂત બનાવવાની મંત્રીશ્રીએ ભાવના વ્યક્ત કરી હતી.
જસદણ ખાતે આયોજિત કેમ્પમાં જસદણ સિવિલ હોસ્પિટલના સ્પેશિયાલિસ્ટ ડોક્ટરની ટીમ ઉપરાંત ડો. મનીષભાઈ બાવળિયાના માર્ગદર્શનમાં રાજકોટના હૃદય, ફેફસાં, મગજ, કિડની, હાડકા, બાળકો અને સ્ત્રી રોગના ૧૦થી વધુ સુપર સ્પેશિયાલિસ્ટ ડોક્ટરની ટીમ દ્વારા દર્દીઓના નિદાન અને સારવારની કામગીરી હાથ ધરવામાં આવી હતી.
વધુમાં જરૂરિયાત મુજબ દર્દીઓને લોહીના રિપોર્ટ તેમજ એક્સ-રેની સુવિધા પણ કેમ્પ ખાતે ઉભી કરવામાં આવી છે. કેમ્પમાં બપોરે ૧૨ વાગ્યા સુધીમાં ૩૫૦થી વધુ દર્દીઓએ લાભ લીધો હતો.
જસદણ નગરપાલિકા ખાતે આયોજિત કેમ્પમાં તાલુકા પંચાયત પ્રમુખશ્રી ભાવનાબેન હરેશભાઈ વેકરીયા, નગરપાલિકા પ્રમુખશ્રી જીતેન્દ્રભાઈ છાયાણી, શ્રી ચંકીભાઈ રામાણી સોનલબેન વસાણી, જસદણ સિવિલ હોસ્પિટલના ડો. આર. એન. મૈત્રીય, જસદણ તાલુકા આરોગ્ય અધિકારી ડો. સી. કે. રામ સહિત તાલુકા આરોગ્ય વિભાગના કર્મચારીઓ તેમજ મોટી સંખ્યામાં જસદણ તાલુકાના દર્દીઓ કેમ્પમાં સહભાગી બન્યા હતા.
