તા. ૮મી ડીસેમ્બરે આહવાની વિજ્ઞાન કોલેજ ખાતે સવારે ૮:૦૦ વાગ્યાથી શરૂ થશે મત ગણતરી
રિપોર્ટ ડાંગ અમરનાથ જગતાપ
આહવા: તા: ૭ : ૧૫મી ગુજરાત વિધાનસભાની સામાન્ય ચૂંટણી-૨૦૨૨નુ પરિણામ તા. ૮મી ડીસેમ્બરે જાહેર થનાર છે, ત્યારે જિલ્લા ચૂંટણી તંત્રે મત ગણતરી માટેની તમામ તૈયારીઓને આખરી ઓપ આપી દીધો છે.
ચૂંટણી અધિકારી-વ-પ્રાંત અધિકારી શ્રી રાજેન્દ્રસિંહજી ચૌહાણના જણાવ્યા અનુસાર, ૧૭૩-ડાંગ (S.T.) વિધાનસભા મતદાર વિભાગની પ્રથમ ચરણમા, એટલે કે તા.૧લી ડીસેમ્બરે યોજાયેલી ચૂંટણીની મત ગણતરી, આહવાની વિજ્ઞાન કોલેજ ખાતે તા. ૮મી ડીસેમ્બરે સવારે ૮:૦૦ વાગ્યાથી હાથ ધરાશે.
આ માટે અંદાજીત ત્રણસો જેટલા ચૂનંદા કર્મચારી/અધિકારીઓની સેવા લેવામા આવી રહી છે. વિજ્ઞાન કોલેજના મત ગણતરી હોલમા પ્રથમ પોસ્ટલ બેલેટની ગણતરી બાદ ચોવીસ જેટલા રાઉન્ડની ગણતરી હાથ ધરવાની ચૂંટણી તંત્રે તૈયારીઓ કરી છે. જિલ્લા ચૂંટણી અધિકારી-વ-કલેક્ટર શ્રી ધર્મેન્દ્રસિંહજી જાડેજાના માર્ગદર્શન હેઠળ સમગ્ર ચૂંટણી પ્રશાસન, સંબંધિત અધિકારી/કર્મચારીને માર્ગદર્શિત કરી રહ્યું છે.
ઉલ્લેખનિય છે કે, ડાંગ જિલ્લામા કુલ નોંધાયેલા ૯૬,૩૮૭ સ્ત્રી, ૯૬,૯૦૯ પુરુષ, અને ૨ થર્ડ જેન્ડર મતદાતાઓ મળી કુલ- ૧,૯૩,૨૯૮ મતદારો પૈકી ૬૪,૭૧૬ પુરુષ, અને ૬૫,૪૪૮ સ્ત્રી મળી કુલ-૧ લાખ ૩૦ હજાર ૧૬૪ મતદારોએ, તા. ૧લી ડીસેમ્બરના રોજ મતદાન કરતા, અંહી ૬૭.૩૩ ટકા મતદાન નોંધાવા પામ્યુ છે.
