રિપોર્ટ ડાંગ અમરનાથ જગતાપ
આહવા: તા: 15: કેન્દ્ર સરકારની CSS 10 હજાર FPO બનાવવાની યોજના હેઠળ ઇમ્પલીમેન્ટેશન એજન્સી ગુજરાત એગ્રો ઈન્ડસ્ટ્રીઝ કોર્પોરેશન લિમિટેડ (સાહસ ગુજરાત સરકાર) અને CBBO ટ્રુ લાઈફ એન્ટરપ્રાઈઝ હેઠળ આહવા તાલુકામા બનેલ FPC “આહવા તાલુકા નેચરલ ફાર્મ પ્રોડક્ટ પ્રોડ્યુસર કંપની લિમિટેડ” ની પ્રથમ વાર્ષિક સાધારણ સભાનુ આયોજન ડાંગ ધારાસભ્ય તેમજ વિધાનસભા નાયબ દંડકશ્રી વિજયભાઇ પટેલની અધ્યક્ષતામા કરવામા આવ્યુ હતુ.
સભામા FPC ચેરમેન શ્રી વિજયભાઈ પટેલે સભાને FPO વિશે જનરલ માહિતી આપી, ગત વર્ષમા થયેલ આવક જાવકનુ સરવૈયુ સભાસદો સમક્ષ રજૂ કર્યું હતુ.
આ FPO ના નેજા હેઠળ આગામી મહિનામા પ્રોસેસિંગ સેન્ટર ચાલુ કરવા સાથે, પ્રાકૃતિક ડાંગ જિલ્લાના ખેત ઉત્પાદનો જેવા કે રાગી, વરઈ, આંબામોર ચોખા, દૂધ મલાઈ ચોખા જેવા વિશેષ ઉત્પાદનોનુ મૂલ્યવર્ધન કરી દેશ દુનિયામા વેચાણ કરવામા આવનાર છે તેમ જણાવ્યુ હતુ.
CBBO સ્ટેટ પ્રોજેક્ટ ઓફિસર શ્રી માધવ જોષીએ ડાંગ જિલ્લામા ખેડુતોને પ્રાકૃતિક કૃષિની તાલીમ, પોતાના જ ગામમા મળી રહે તેવા હેતુ થી 232 જેટલા “પ્રાકૃતિક કૃષિ મોડેલ ફાર્મ” બનાવવાની જાહેરાત કરી હતી. જેમાંથી વઘઈ તાલુકામા 96 મોડેલ ફાર્મ બનવાની જાહેરાત પણ કરાઇ હતી.
આ પ્રંસગે આહવા તાલુકા પંચાયત પ્રમુખ શ્રીમતી કમળા બેન, ગુજરાત એગ્રો પ્રતીનિધી શ્રી કેશુભાઈ મોકરિયા, અપૂર્વભાઈ જાની, CBBO ના સ્ટેટ પ્રોજેક્ટ ઓફીસર માધવ ભાઈ જોષી, જિલ્લા પ્રોજેક્ટ ઓફિસર ભરત ભાઈ સોલંકી અને ટીમ તેમજ અન્ય અધિકારીઓ હાજર રહ્યા હતા.
