ગિરિમથક સાપુતારા ખાતે આજથી એક મહિના માટે યોજાશે ‘મેઘમલ્હાર પર્વ’

વિવિધ રમત સ્પર્ધાઓ, મનોરંજક એક્ટિવિટી સહિત શ્રેણીબદ્ધ કાર્યક્રમોનો પણ લ્હાવો મળશે

રાજ્યના પ્રવાસન મંત્રી શ્રી પુરણેશભાઈ મોદી તથા આદિજાતિ વિકાસ મંત્રી શ્રી નરેશભાઈ પટેલ મોન્સૂન ફેસ્ટિવલનો પ્રારંભ કરાવશે

સતત એક માસ ચાલનારા ‘મેઘમલ્હાર પર્વ’ દરમિયાન પર્યટકોને માણવા મળશે રંગારંગ સાંસ્કૃતિક કાર્યક્રમો

રિપોર્ટ ડાંગ અમરનાથ જગતાપ

આહવા: તા: ૨૯: ગુજરાતના એકમાત્ર ગિરિમથક સાપુતારા ખાતે આજથી, એટલે કે તા.૩૦મી જુલાઈથી એક માસ માટે મેઘમલ્હાર પર્વ (મોન્સૂન ફેસ્ટિવલ) નો પ્રારંભ કરાશે.

ગુજરાત પ્રવાસન નિગમ લિમિટેડ તરફથી પ્રાપ્ત વિગતો અનુસાર તા.૩૦/૭/૨૦૨૨ ના રોજ સવારે ૯ વાગ્યે, બોટિંગ હાઉસના પટાંગણમા આયોજિત મેઘમલ્હાર પર્વ (મોન્સૂન ફેસ્ટિવલ) ના ઉદ્ઘાટન સમારોહમા, રાજ્યના પ્રવાસન, યાત્રાધામ વિકાસ, નાગરિક ઉડયન, માર્ગ મકાન, અને વાહન વ્યવહાર મંત્રી શ્રી પૂરણેશભાઈ મોદી, આદિજાતિ વિકાસ, અન્ન નાગરિક પૂરવઠા અને ગ્રાહક સુરક્ષા મંત્રી-વ-ડાંગના પ્રભારી મંત્રી શ્રી નરેશભાઈ પટેલ, પ્રવાસન, યાત્રાધામ વિકાસ, નાગરિક ઉડયન, અને વાહન વ્યવહાર રાજયમંત્રી શ્રી અરવિંદભાઈ રૈયાણી ઉપસ્થિત રહેશે.

આ વેળા મુખ્ય અતિથિ તરીકે ડાંગ જિલ્લા પંચાયતના પ્રમુખ શ્રી મંગળભાઈ ગાવિત, સાંસદશ્રી ડો.કે.સી.પટેલ, ધારાસભ્ય શ્રી વિજયભાઈ પટેલ પણ ઉપસ્થિત રહેશે. જ્યારે પ્રવાસન, દેવસ્થાન, યાત્રાધામ, નાગરિક ઉડયન, અને ઉદ્યોગ અને ખાણ વિભાગના સચિવ શ્રી હારીત શુક્લ, ગુજરાત પ્રવાસન નિગમ લિમિટેડના કમિશનર-વ-મેનેજિંગ ડિરેકટર શ્રી આલોકકુમાર પાંડે, અને ડાંગ કલેકટર શ્રી ભાવિન પંડયા વિશેષ હાજરી આપશે.

મેઘમલ્હાર પર્વ-૨૦૨૨ના પ્રારંભ સાથે સાપુતારા ખાતે ગુજરાત પ્રવાસન નિગમ દ્વારા તૈયાર કરાયેલા અંદાજીત ₹ ૨૪.૫૮ કરોડના વિવિધ પ્રકલ્પોનુ પણ પ્રજાર્પણ કરાશે. તે પૂર્વે રંગારંગ ઉદ્ઘાટન પરેડ પણ યોજાશે.

આજે મહાનુભાવો જે પ્રકલ્પ પ્રજાર્પણ કરશે તેમા મ્યૂઝિકલ ફાઉન્ટેન, એમ્ફિ થિયેટર, એડ્વેંચર પાર્ક, બોટિંગ જેટ્ટી એરિયા ડેવલપમેન્ટ, અને ફ્લોટિંગ જેટ્ટી હયાત લેકની ફરતે કેનોપીઝ, મોલ રોડના વિકાસની કામગીરી, મહાદેવ મંદિર પાસે પાર્કિંગ, માઇનોર બ્રીજ્સ, દુકાનો, ટીસીજીએલ શોપ્સનુ રિનોવેશન વિગેરેનો સમાવેશ થાય છે.

ઉલ્લેખનીય છે કે, ચોમાસામા નવપલ્લવિત થઈ ઉઠતી ડાંગ જિલ્લાની પ્રકૃતિને માણવા આવતા પર્યટકોને મેઘમલ્હાર પર્વ દરમિયાન સાપુતારાના મુખ્ય ડોમ ખાતે શનિ, રવિની રજાઓ સહિત જાહેર રજાઓના દિવસે વિવિધ સાંસ્કૃતિક કાર્યક્રમો માણવા મળશે. તો તા.૧૯/૮/૨૦૨૨ને જન્માષ્ટમી પર્વે દહીં હાંડી સ્પર્ધા, રેઇન રન મેરેથોન, બોટ રેસિંગ, તથા નેચર ટ્રેઝર હન્ટ ના વિશેષ કાર્યક્રમોનુ પણ આયોજન કરાયુ છે.

આ ઉપરાંત સમગ્ર પર્વ દરમિયાન આર્ટ ગેલેરી વર્કશોપ, ફોટોગ્રાફી, આર્ટ પેઇન્ટિંગ, બામ્બુ ક્રાફ્ટટિંગ, વારલી પેઇન્ટિંગ, યોગા ક્લાસીસ, કવીઝ કોન્ટેસ્ટ, સેમિનાર, રંગોળી સ્પર્ધા, મ્યુઝિકલ લર્નિંગ કોમ્પિટિશન, ફોટોગ્રાફી કોમ્પિટિશન, વિવિધ રમત સ્પર્ધાઓ, મનોરંજક પ્રવૃત્તિઓ વિગેરેમા પણ પર્યટકોને ભાગ લેવાનો મોકો મળશે.